ეკონიმიკის მინისტრის მოადგილის დიმიტრი ქუმსიშვილის განცხადებით, სახელმწიფომ 40-ზე მეტ ინვესტორს შეუსრულებელი ვალდებულებებისთვის დაკისრებული ჯარიმები აპატია და ამ დროისთვის ინვესტორებისთვის სრულად ნაპატიები თანხის ოდენობა 2 მილიონ 800 ათას ლარს შეადგენს.
აღნიშნული გადაწყვეტილება სახელმწიფო ქონების განკარგვის მიზნით დადებულ ხელშეკრულებებთან დაკავშირებული საკითხების შემსწავლელმა კომისიამ მიიღო. ამ კომისიას ქუმსიშვილი ხელმძღვანელობს.
„არიან კომპანიები, რომლებსაც პირობით ვაპატიეთ ჯარიმები, რათა მათ განაახლონ საქმიანობა. აქ საუბარია ძალიან ბევრ მილიონზე. პირობით ნაპატიებია 10 მილიონ ლარზე მეტი, რაც ჩვენ გვაძლევს შესაძლებლობას, ინვესტორებმა განაახლონ საქმიანობა და მივაღწიოთ ახალ შეთანხმებებს.ეს ყველაფერი ინვესტიციების წახალისების მიზნით კეთდება", - განაცხადა დიმიტრი ქუმსიშვილმა.
სახელმწიფო ქონების განკარგვის მიზნით დადებულ ხელშეკრულებებთან დაკავშირებული საკითხების შემსწავლელი კომისია ეკონომიკის მინისტრ გიორგი კვირიკაშვილის ინიციატივით, საქართველოს მთავრობის 28 მარტის დადგენილებით შეიქმნა.
