30 ნოემბერს, 20:00 საათზე, საქართველოს კულტურისა და ძეგლთა დაცვის სამინისტროსა და თბილისის მერიის კულტურული ღონისძიებების ცენტრის მხარდაჭერით, შოთა რუსთაველის სახელობის სახელმწიფო დრამატულ თეატრში კომპოზიტორ გიორგი ცაბაძის 90 წლისადმი მიძღვნილი საიუბილეო საღამო გაიმართება.

კონცერტში მონაწილეობას მიიღებენ  ქართული ესტრადის ძველი და ახალი თაობის წარმომადგენლები: ანსამბლი „ორერა", „დიელო", „ქართული ხმები", „ფორტე", ნუგზარ კვაშალი, ნატო მეტონიძე, სალომე ბაკურაძე, სოფო ბედია, სოფო ხალვაში, მაკა ზამბახიძე, თბილისური კვარტეტი, ნოდიკო ტატიშვილი, გიორგი მახარაშვილი, ასევე სექსტეტი და კვარტეტი ბუკა კარტოზიას ხელმძღვანელობით.

საიუბილეო საღამოზე შესრულდება გიორგი ცაბაძის ამ დრომდე უცნობი სიმღერებიც.