მთავარმა პროკურორმა ირაკლი შოთაძემ დღეს სისტემის სხვადასხვა რგოლების წარმომადგენლებთან შეხვედრის შემდეგ განაცხადა, რომ დაწესდება კონკრეტული დღე, რა დროსაც მოქალაქეებს შესაძლებლობა ექნებათ, მთავარ პროკურორს შეხვდნენ.
„მიმაჩნია, რომ მნიშვნელოვანია, პროკურატურა უფრო მეტად განვითარდეს. ამისათვის პროკურორების დამოუკიდებლობის გაძლიერება და გაზრდაა საჭირო, უნდა ამაღლდეს მათი კვალიფიკაცია, რისთვისაც ჩატარდება შესაბამისი სწავლებები და ტრენინგები. ასევე ძალიან მნიშვნელოვანია საზოგადოებასთან, ჩვეულებრივ მოქალაქეებთან ურთიერთობის მხრივ კონკრეტული ნაბიჯების გადადგმა ამ მიმართულებით. ჩვენ ვაპირებთ უახლოეს მომავალში შესაბამისი ღონისძიებების გატარებას. თითოეული რაიონული ოლქის პროკურორთან მოქალაქეებს გამოეყოფათ ღია კარის დღე, რა დროსაც შესაძლებლობა ექნებათ, შეხვდნენ მას. ასევე მე ვაპირებ დავაწესო კონკრეტული დღე, რა დროსაც მოქალაქეებს ექნებათ შესაძლებლობა პირადად ჩემთან შეხვედრის და მათი ჭირ-ვარამის გაზიარების", - განაცხადა ირაკლი შოთაძემ.
მისი თქმით, ეს ყველაფერი მიმართულია იქით, რომ პროკურორებმა კარგად გაიაზრონ და გაითავისონ, თუ რა აწუხებთ ხალხს და რა პრობლემებს ხედავენ პროკურატურის სისტემაში.
