იუსტიციის უმაღლეს საბჭოში საქალაქო და სააპელაციო სასამართლოების მოსამართლეობის კანდიდატებთან გასაუბრება მიმდინარეობს.
იუსტიციის უმაღლესი საბჭოს თავმჯდომარემ, უზენაესი სასამართლოს თავმჯდომარე ნინო გვენეტაძემ ჟურნალისტებს განუცხადა, რომ სულ სასამართლოების სისტემაში 61 ვაკანტური ადგილია და კონკურსი ორეტაპიანია.
„პირველი ეტაპი უკვე გავლილია. ეს არის დოკუმენტაციის შეგროვება, რომელიც კონკრეტულმა კანდიდატურებმა წარმოადგინეს და ასევე რაც იუსტიციის უმაღლეს საბჭოს ჰქონდა მათ შესახებ. დღეს იწყება მეორე - გასაუბრების ეტაპი. საბჭოს წევრების მიერ კონკრეტული კანდიდატი გამოიკითხება კეთილსინდისიერების, კვალიფიკაციის, პროფესიონალიზმის და ყველა იმ სტანდარტის გათვალისწინებით, რომლის საფუძველზეც უნდა მოხდეს კენჭისყრა. საერთო სასამართლოების სისტემაში მთელი საქართველოს მასშტაბით 61 ვაკანტური ადგილია. ვცდილობთ, ძალიან გამჭვირვალედ, ყველა პროცედურის დაცვით განვახორციელოთ გასაუბრება, რის შემდეგაც უკვე დაიწყება კენჭისყრები", - განაცხადა ნინო გვენეტაძემ.
