„FBI-ის დასკვნის ექსპერიმენტული ნაწილი უმნიშვნელოვანესია", - ამბობს ზურაბ ჟვანიას ძმა გოგლა ჟვანია. მისი თქმით, ის ადასტურებს, რომ უბედური შემთხვევა არ მომხდარა. თუმცა ჟვანიას თქმით, დასკვნის შეფასებით ნაწილში ორაზროვანი ფრაზებია. „ვფიქრობ, მთავარი მაინც ექსპერიმენტული ნაწილია. ამ დასკვნაში შავით თეთრზე წერია - სანამ ექსპერიმენტი დაიწყებოდა, დაათვალიერეს გამათბობელი და მასზე ვერ აღმოაჩინეს მურის კვალი, რაც არასრული წვის მანიშნებელი იქნებოდა. არადა, CO სწორედ არასრული წვის პროდუქტია!" - განაცხადა ჟვანიამ.

მისი თქმით, ამას გარდა, საქმეში მნიშვნელოვანი მოწმეებიც არსებობენ.

„ერთ-ერთი სიახლე ისიც არის, რომ აღმოჩნდა ფირი, სადაც ზურასთვის თავის არეში მიყენებული დაზიანებები ჩანს. ეს ფირი განადგურებას შემთხვევით გადაურჩა, რადგან უამრავ მასალას შორის მას კარგად არ დააკვირდნენ. ის გადაიღო შსს-ს ოპერატორმა, რომელიც ცოცხალი მოწმეა. შედგა მნიშვნელოვანი დოკუმენტი, რომელიც უკვე საქმეშია ჩაკერებული. ცხადია, წინა ხელისუფლების დროს არც ეს ფირი და არც შესაბამისი დოკუმენტი საქმეში არ იყო. ამ ფირზე კარგად ჩანს ტრეპანაციისას ძვლის ქვეშ არსებული დაზიანებები, ტვინის გარსზე სისხლჩაქცევები და სხვა. ექსპერტებმა ნახეს ფირი და ოფიციალური დასკვნაც დაწერეს, სადაც წერია, რომ ზურას, სავარაუდოდ, ბლაგვი საგნით მიაყენეს დაზიანება", - განაცხადა ჟვანიამ.

წყარო: გაზეთი „კვირის პალიტრა"

(მოამზადა ალა გრიგალაშვილმა)