„იუკოსის" ყოფილი ხელმძღვანელი მიხეილ ხოდორკოვსკი ამტკიცებს, რომ მისთვის და მისი კომპანიის თანამშრომლებისთვის წაყენებული ბრალდება ნეფტიუგანსკის მერის მკვლელობასთან კავშირში - ფალსიფიცირებულია. ხოდორკოვსკიმ ამის შესახებ ონლაინ-პრესკონფერენციაზე ისაუბრა.
„ვლადიმირ პეტუხოვის მკვლელობა იმავე წელს გაიხსნა, როცა მოხდა - 1998 წელს. მოძებნეს და დააპატიმრეს შემსრულებლები, თუმცა, გაურკვეველი მიზეზების გამო, გაათავისუფლეს და შემდეგ მოკლეს", - განაცხადა ხოდორკოვსკიმ.
ხოდორკოვსკი უარყოფს მისი კომპანიის კავშირს მერ პეტუხოვის მკვლელობასთან და ამ ბრალდების მიზეზად თავის პოლიტიკურ აქტიურობას ასახელებს.
„იუკოსის" თანამშრომლების მკვლელობასთან მიბმის ფალსიფიცირება მოხდა 2003 წელს - მას შემდეგ, რაც მე საჯაროდ განვაცხადე ხელისუფლების მაღალ ეშელონებში არსებულ კორუფციაზე", - აღნიშნა ხოდორკოვსკიმ.
ამავე დროს, „იუკოსის" ყოფილი ხელმძღვანელი გამორიცხავს საგამოძიებო ორგანოებთან თანამშრომლობას. „არ ვაპირებ ამ შოუში მონაწილეობის მიღებას", - განაცხადა ხოდორკოვსკიმ და დაუმატა, რომ არ შეუძლია პროგნოზირება, როგორ დასრულდება აღნიშნული გამოძიება.
