საპარლამენტო უმრავლესობის წევრი ეკა ბესელია პროკურატურას ალეკო ელისაშვილის განცხადებების დროული და სრულყოფილი გადამოწმებისკენ მოუწოდებს. ამის შესახებ ბესელიამ „ქრონიკის სტუდიაში" საუბრისას განაცხადა და აქვე დასძინა, რომ თუკი დადასტურდება, რომ რომელიმე მაღალჩინოსანი ანგარების მოტივით ეხმარებოდა რომელიმე პატიმარს, დანაშაულის ჩამდენი აუცილებლად უნდა დაისაჯოს.
„მთელი გუნდი პროკურატურისგან ვითხოვთ, რომ სრულყოფილად, დეტალურად, ობიექტურად, სწრაფად მოხდეს ყველა ფაქტის გადამოწმება. ზოგადად ვერაფერს გამოვრიცხავ. ამიტომ სჭირდება ამ კონკრეტულ შემთხვევას გამოკვლევა. ვინც არ უნდა იყოს ის ადამიანი, ვინც თავს უფლებას მისცემს და ასეთ ამაზრზენ რამეზე წავა, რომ ანგარების მოტივით პატიმარს დაეხმარება, ასეთ ამაზრზენ საქციელს ვინც ჩაიდენს, პასუხი უნდა მოეთხოვოს.
აქვე კითხვები მიჩნდება ელისაშვილთან, თუ რატომ ემთხვევა ეს განცხადება, წელიწად ნახევრის შემდეგ, წინასაარჩევნო გარემოს", - განაცხადა ეკა ბესელიამ.
