არასამთავრობო ორგანიზაცია „ახალგაზრდული ცენტრის" წევრი გიორგი ჩიქოვანი საკრებულოს დამოუკიდებელი დეპუტატის ალეკო ელისაშვილის წინააღმდეგ საქმის აღძრას ითხოვს. როგორც ჩიქოვანი განმარტავს, ელისაშვილის წინააღმდეგ საქმე სამართალდამცავი ორგანოებისთვის დანაშაულის შეუტყობინებლობის მუხლით უნდა აღიძრას.
„მსურს, დავაფიქსირო ჩვენი ორგანიზაციის პოზიცია ბოლო დროს განვითარებულ მოვლენებთან დაკავშირებით. კერძოდ, განცხადება შეეხება ალეკო ელისაშვილის ქმედებებსა და განცხადებებს.
მოგეხსენებათ, ელისაშვილი პოლიტიკური თანამდებობის მქონე პირების მიერ ჩადენილ შესაძლო დანაშაულზე საუბრობს, რომელსაც ადგილი ჰქონდა წელიწადნახევრის წინ. ელისაშვილი ასევე აღნიშნავს, რომ ამის შესახებ საქმის კურსში ჩააყანა იმდროინდელი მთავარი პროკურორი ბატონი გიორგი ბადაშვილი. ბადაშვილი კი ელისაშვილთან ამ საქმეზე საუბარს უარყოფს. ამ შემთხვევაში, ჩვენთვის ბადაშვილის განცხადება გახლავთ უფრო სარწმუნო, ვიდრე ბატონი ელისაშვილის. სწორედ ამიტომ, მოვუწოდებთ სამართალდამცავ ორგანოებს, საქმე აღძრან ბატონი ელისაშვილის წინააღმდეგ. კერძოდ, მას ბრალი უნდა წარუდგინონ დანაშაულის შეუტყობინებლობისათვის", - აცხადებს ჩიქოვანი.
