„ვერ ვხედავ გარდაუვალ აუცილებლობას, რომ დღეს ჩვენს ქვეყანას პოლიტიკაში სჭირდება პაატა ბურჭულაძე და მისი გუნდი", - ამის შესახებ სოციოლოგმა ზურაბ ბიგვავამ „პრაიმტაიმს" განუცხადა. მისი თქმით, გარკვეული პოლიტიკური გუნდები გააქტიურდნენ, რადგან მათ გაუჩნდათ წარმატების მიღწევის ილუზია იმ ფონზე, რომ ამომრჩეველთა დიდი რაოდენობა არჩევნების მიმართ ნიჰილისტურად არის განწყობილი. „რეალურად, ეს სულაც არ ნიშნავს იმას, რომ რომელიმე გუნდს მისცემენ ხმას", - განაცხადა ბიგვავამ.
რაც შეეხება პაატა ბურჭულაძის შანსებს, ბიგვავას თქმით, ბურჭულაძის ურთიერთობა გარკვეულ სასულიერო პირებთან საკმარისი არაა იმისთვის, რომ მან არჩევნებში წარმატებას მიაღწიოს.
„ჯერჯერობით პოლიტიკაში მისი მოღვაწეობა ძალიან ეფემერულია, რადგან მისი გუნდი არ ტოვებს შთაბეჭდილებას, რომ ერთიანი მიზნები და ღირებულებები აქვთ. ჩემი აზრით, მათი შანსები დაბალია. დავუშვათ, ფინანსები აქვთ, მაგრამ ამ ეტაპზე გაურკვეველია იდეა, გუნდის საერთო ღირებულებები. რაც მთავარია, ბურჭულაძეს მოუწევს საარჩევნო კომისიებში რესურსის მოძიება, პარტიული ინფრასტრუქტურის გაშლა. ეს კი სკრუპულოზური და პროფესიონალური სამუშაოა, რისი გამოცდილებას მის გუნდს არ აქვს", - განაცხადა ბიგვავამ.
წყარო: გაზეთი „პრაიმტაიმი"
(მოამზადა ალა გრიგალაშვილმა)
