ბერი გაბრიელის გამზირზე მომხდარი მკვლელობის შესახებ ახალი დეტალები გახდა ცნობილი. არსებული ინფორმაციით, მოკლული პირი ექიმია, რომელიც მკვლელობაში ეჭვმიტანილის ოჯახთან ახლობლობდა.
„ბრალდებულს ახასიათებს ფსიქიკური აშლილობა და დღეს ჰქონდა შეტევა, რა დროსაც ოჯახის წევრებმა დასახმარებლად ოჯახის ახლობელ ექიმს დაურეკეს, რომელიც ფსიქიატრიულ საავადმყოფოში მუშაობს. ის თანამშრომელთან ერთად მივიდა ადგილზე, რა დროსაც ბრალდებულმა ორივეს ესროლა. ოჯახის ახლობელი ექიმი ადგილზევე გარდაიცვალა, ხოლო მეორე ექიმი დაიჭრა", - აცხადებენ მკვლელობის ადგილზე.
გავრცელებული ინფორმაციით, აღნიშნულის შემდეგ მკვლელობაში ეჭვმიტანილი ოთახში ჩაიკეტა, თუმცა, კარი სპეცრაზმმა შეამტვრია და დააკავა. დაკავებისას მან პოლიციას წინააღმდეგობა გაუწია, რის გამოც ფეხში მსუბუქად დაიჭრა. ორივე დაჭრილი ინგოროყვას კლინიკაშია გადაყვანილი.
