რესპუბლიკური პარტია ე.წ. კოკაინის საქმის მთავარი ფიგურანტის ნუგზარ ბოჭორიშვილისა და პარტიის ურთიერთობის შესახებ განცხადებას ავრცელებს:

„მიმდინარე წლის 14 დეკემბერს ქალბატონმა მანანა კობახიძემ საჯაროდ განაცხადა, რომ ე.წ. კოკაინის საქმესთან დაკავშირებული ნუგზარ ბოჭორიშვილი, რომლის ადვოკატიც თავად იყო, შესაძლოა, რესპუბლიკური პარტიის წევრობის გამო იდევნებოდა. ამ მოტივით ითხოვდა ბოჭორიშვილი პოლიტიკური რეპრესიის მსხვერპლად მის აღიარებას 2012 წ. ბოლოს.

სწორედ რესპუბლიკელი დეპუტატების მკაფიო, ნეგატიური პოზიციის გამო არ აღმოჩნდა ნუგზარ ბოჭორიშვილი საბოლოოდ პოლიტიკური რეპრესიების მსხვერპლთა სიაში.

ნუგზარ ბოჭორიშვილი პარტიის რიგითი წევრი იყო 2005 წ. სექტემბრიდან 2008 წ. მაისის ჩათვლით. 2010 წ. ზაფხულში მომხდარი დანაშაულის, ე.წ. კოკაინის საქმის დროს ბოჭორიშვილი პოლიტიკური დევნის ობიექტი ვერ იქნებოდა თუნდაც იმიტომ, რომ ორი წელი გაწყვეტილი ჰქონდა ყოველგვარი ურთიერთობა პარტიასთან", - ნათქვამია პარტიის განცხადებაში.