„კოკაინის საქმეზე" მსჯავრდებული ანასტასია ზაუტაშვილის ადვოკატი მირიან ნიკოლაძე მთავარ პროკურატურაში დაჰკითხეს.
ნიკოლაძემ დაკითხვის შემდეგ განაცხადა, რომ მან გამოძიებას მიაწოდა ყველა მტკიდებულება, რომლითაც ელისაშვილისა და ქორიძის მიერ გაკეთებული განცხადებები ბათილდება.
მისი თქმით, ზვიად ქორიძემ გამოძიებას მისცა ცრუ ჩვენება, რისთვისაც იგი სისხლის სამართლის პასუხისგებაში უნდა მიეცეს.
ადვოკატმა ასევე ისაუბრა სასჯელაღსრულების დაწესებულებაში მისი დაცვის ქვეშ მყოფების დაკითხვასთან დაკავშირებით. მირიან ნიკოლაძის განცხადებით, ანასტასია ზაუტაშვილს შეკითხვები დაუსვეს მანანა კობახიძესთან და ეკა ბესელიასთან დაკავშირებით და მან ჩვენება მისცა სხვა პატიმრებისა და ციხის ადმინისტრაციის წარმომადგენლების თანდასწრებით.
ნიკოლაძის განცხადებით, ანასტასია ზაუტაშვილი კატეგორიულად უარყოფს ზვიად ქორიძის განცხადებას, თითქოს ქორიძეს მსჯავრდებულმა უთხრა, რომ ეკა ბესელიას შეწყალების დაპირების სანაცვლოდ თანხა გადაეცა.
ამასთან, ადვოკატის მტკიცებით, იმ შემთხვევაში, თუკი პროკურატურა პასუხისგებაში არ მისცემს ალეკო ელისაშვილსა და ზვიად ქორიძეს, „კოკაინის საქმეზე" მსჯავრდებულები უკიდურესი ზომებით, მათ შორის თვითდაზიანებებით იმუქრებიან. ადვოკატის განცხადებით, მსჯავრდებულები მოითხოვენ, რომ პირველ იანვრამდე დადგეს შედეგი და დაისაჯონ დამნაშავეები.
