სახელმწიფო უსაფრთხოების სამსახურმა გასულ კვირას გურიაში 4 ახალგაზრდა მამაკაცი დააპატიმრა, რომლებსაც ისლამურ სახელმწიფოსთან კავშირი ედებათ ბრალად. ექსპერტ მამუკა არეშიძის განცხადებით, დაკავებულ პირთაგან ერთ-ერთს ნამდვილად ჰქონდა კავშირი რადიკალური ისლამის წარმომადგენლებთან როგორც საქართველოში, ისე საქართველოს გარეთ. უდანაშაულობის პრეზუმფციიდან გამომდინარე, არეშიძე მის ვინაობას არ აკონკრეტებს, რაც შეეხება დანარჩენ 3 პირს, ექსპერტი მათ შესახებ ინფორმაციას არ ფლობს.

ამასთან, ექსპერტის ინფორმაციით, გურიის სოფლებში: ნასაკირალში, ბუკნარში, ზოტში - ბევრი ისეთი ადამიანია, რომლებსაც რადიკალ ისლამისტებთან აქვთ კავშირი. „თუმცა იქ არიან ზომიერი ისლამისტებიც, რომლებისთვისაც საქართველოს სიყვარული და პატრიოტიზმი უცხო ნამდვილად არ არის", - განაცხადა ექსპერტმა.

არეშიძის თქმით, ქართული სპეცსამსახურების აქტიურად მუშაობის მიუხედავად, ტერორისტული საფრთხეების სრულად განეიტრალება შეუძლებელია.

„თუ ქართული სპეცსამსახურების მუშაობა უფრო მასშტაბური და თანმიმდევრული გახდება, შეგვიძლია, საფრთხის დონე დაბლა დავწიოთ, თუმცა, საშიშროების მთლიანად მოხსნა შეუძლებელია", - განაცხადა არეშიძემ.

წყარო: გაზეთი „ასავალ-დასავალი"

(მოამზადა ალა გრიგალაშვილმა)