ფრაქცია „ქართული ოცნების" წევრი ალექსანდრე ქანთარია ევროკომისიის ანგარიშთან დაკავშირებით „რეპორტიორთან" საუბრისას ამბობს, რომ ევროკომისიის ანგარიში საქართველოსთან დაკავშირებით ნიშნავს ჩვენი ქვეყნის აღიარებას და ნდობას, ეს მიღწევა ქართველი ხალხისა და ხელისუფლების ძალიან მნიშვნელოვანი დამსახურებაა.
„მინდა, მივულოცო საქართველოს მოსახლეობას, ეს არის ძალიან მნიშვნელოვანი ეტაპი და ჩვენი ქვეყნის კიდევ ერთხელ აღიარება. სწორედ თავისუფალი საზღვრების გახსნა შეუწყობს ხელს ჩვენს მოსახლეობას ბიზნესისა და ეკონომიკური მდგომარეობის გაუმჯობესებას. იმედია, ეს დაგვეხმარება აფხაზებთან და ოსებთან ურთიერთობის აღდგენაში. მივესალმები იმასაც, თუ რუსეთი გააუქმებს სავიზო რეჟიმს. საქართველოს მოქალაქეს აღარ ექნება სხვა ქვეყნებში გადაადგილების პრობლემა. ვიზა-ლიბერალიზაცია ნიშნავს იმას, რომ საქართველოს მოქალაქეს უფლება ექნება, დაბრკოლების გარეშე გადაკვეთოს საზღვრები სწავლის, ბიზნესის თუ ვაჭრობის მიზნით. რა თქმა უნდა, ტექნიკური პროცესები ჯერ გაგრძელდება, ხვალვე ვერ მოხდება ამის განხორციელება, მაგრამ საბოლოოდ, სწორედ დადებითი მოვლენებისკენ დაიძვრება საქმე. ეს არის საქართველოს აღიარება და ნდობა, ეს არის ჩვენი ხალხისა და ხელისუფლების ძალიან მნიშვნელოვანი დამსახურება", - აცხადებს ქანთარია „რეპორტიორთან" საუბრისას.
