რელიგიური სიწმინდეებისა და ღვთისმსახურების შეურაცხყოფისთვის შესაძლოა, ფულადი ჯარიმები დაწესდეს. პარლამენტში აღნიშნული კანონპროექტის ინიციატორი ფრაქცია „ქართული ოცნების" თავმჯდომარის მოადგილე სოსო ჯაჭვლიანია, ხოლო კანონპროექტის ავტორი - „საქართველოს დემოგრაფიული საზოგადოება XXI"-ის დირექტორი ზვიად ტომარაძე.

ზვიად ტომარაძემ „კვირის ქრონიკასთან" საუბარში განმარტა, თუ რაზეა საუბარი კანონპროექტში:

„მუხლი 1661. რელიგიური გრძნობების შეურაცხყოფა 1. რელიგიური სიწმინდეების, რელიგიური ორგანიზაციის, ღვთისმსახურისა და მორწმუნის მიმართ სიძულვილის საჯაროდ გამოხატვა ან/და ისეთი მასალის გამოქვეყნება ან ჩვენება, რაც მიზნად ისახავს მორწმუნეთა გრძნობების შეურაცხყოფას გამოიწვევს დაჯარიმებას 300 ლარის ოდენობით. 2. იგივე ქმედება ჩადენილი განმეორებით, გამოიწვევს დაჯარიმებას 600 ლარის ოდენობით. 3. რელიგიური შენობებისა და სხვა რელიგიური სიწმინდეების წაბილწვა, მასზე ნებისმიერი წარწერი გაკეთება ან დაზიანება გამოიწვევს დაჯარიმებას 500 ლარის ოდენობით. 4. იგივე ქმედება ჩადენილი განმეორებით - გამოიწვევს დაჯარიმებას 1000 ლარის ოდენობით", - განაცხადა ტომარაძემ.

გამომდინარე იქიდან, რომ ხელისუფლებას ლიბერალურული კურსი აქვს აღებული, ტომარაძე ფიქრობს, რომ ამ კანონპროექტს დიდი წინააღმდეგობა შეხვდება და მას სიტყვისა და გამოხატვის თავისუფლების ეგიდით დაუპირიპირდებიან.

„ამ ბატონებსა და ქალბატონებს ერთი რამ ავიწყდებათ; ისინი ხომ ყველას უფლებების დაცვას ითხოვენ ხოლმე? და რელიგიებისა და რელიგიური ადამიანების გრძნობებს დაცვა არ უნდა?" - განაცხადა ტომარაძემ.