საქართველოს თავდაცვის მინისტრის თინა ხიდაშელის განცხადებით, როდესაც ლევან მურუსიძის მოსამართლეობასთან დაკავშირებით გადაწყვეტილებას იღებევ, ყველას უნდა ახსოვდეს ირინა ენუქიძე.
ჟურნალისტები თინა ხიდაშელისგან დაინტერესდნენ, თუ რა მოსაზრება აქვს ლევან მურუსიძის მოსამართლეობის კანდიდატურასთან დაკავშირებით.
„მე ვარ აღმასრულებელი ხელისუფლების წარმომადგენელი. როგორ გულითაც არ უნდა მინდოდეს ამ თემაზე კომენტარის გაკეთება, ვერ გავაკეთებ. ნებისმიერი სიტყვა, რომელსაც მე ვიტყვი, იქნება ბევრი სპეკულაციის საგანი, რომ ვერევი სასამართლო ხელისუფლების საქმიანობაში. ერთადერთ რამეს ვიტყვი, დღევანდელი დღე და ირინა ენუქიძე უნდა გვახსოვდეს, როდესაც ასეთი ტიპის გადაწყვეტილებებს მივიღებთ", - განაცხადა ხიდაშელმა.
ხიდაშელის თქმით, თუკი შესაძლოა, ვისაუბროთ იმაზე, რომ არსებობს დედა, რომელმაც გადაარჩინა სხვა დედის შვილები, ალბათ ასეთები ირინა ენუქიძე და ია მეტრეველი არიან.
„ძალიან მნიშვნელოვანი დღეა და მინდა, მადლობა ვუთხრა პრეზიდენტს. ჩვენ როდესაც ხელისუფლებაში მოვედით, სულ პირველი საჯარო განცხადება, რომელიც საქართველოს პარლამენტში გაკეთდა, იყო სწორედ ირინა ენუქიძის განსაკუთრებული როლის აღნიშვნა და ამის დაფასება. ეს სჭირდება მის ოჯახს, სჭირდება საქართველოს, რომ ამბავი, რომელმაც ქვეყანა გამოიყვანა უმძიმესი მდგომარეობიდან, არ უნდა დარჩეს შეუმჩნეველი. ამიტომ არის დღევანდელი დღე ძალიან მნიშვნელოვანი. სისტემა დაანგრია არა სანდრო გირგვლიანის მკვლელობამ, არამედ დაანგრია ირინა ენუქიძის გმირობამ. თუკი შესაძლოა ვისაუბროთ იმაზე, რომ არსებობს დედა, რომელმაც გაადარჩინა ძალიან ბევრი სხვა დედის შვილები, ალბათ ირინა ენუქიძე და ია მეტრეველი არიან ასეთი დედები. პრეზიდენტს მადლობა მინდა ვუთხრა ირინა ენუქიძის წვლილის დაფასებისთვის, მის მიერ დაწყებული საქმის დაფასებისთვის. საქართველოს სჭირდება მუდამ ამის გახსენება, რომ აღარასოდეს დაგვემართოს განუკითხაობა, აღვირახსნილობა სახელმწიფო თანამდებობის პირების მხრიდან, რასაც შეეწირა სანდრო გირგვლიანი, ირინა ენუქიძე და ძალიან ბევრი ახალგაზრდა მაშინდელ საქართველოში", - განაცხადა თინა ხიდაშელმა.
