შეწყალების კომისიის სკანდალთან დაკავშირებულ პროცესებს დიდ სიბინძურეს უწოდებს ექსპერტი ალექსანდრე თვალჭრელიძე. მისი თქმით, ეს ისეთი პოლიტიკური თამაშია, რომელსაც გამარჯვებული არ ეყოლება.
„ისმის კითხვა: რატომ დაიწყო ამაზე ლაპარაკი ელისაშვილმა ახლა და არა წელიწადნახევრის წინ, როდესაც თურმე ეს პროცესები მიმდინარეობდა? რატომ მაინცდამაინც ახლა, როდესაც არჩევნები მოახლოვდა?! თუ ეს მართალია და დამტკიცდება, რომ დასახელებული და კიდევ სხვა მაღალჩინოსნებიც ცდილობდნენ მძიმე დანაშაულის ჩამდენი პირების შესაწყალებელ პირთა სიაში შეყვანას, ისინი აუცლებლად უმკაცრესად უნდა დაისაჯონ. ამ საქმის ჩაფარცხვა ხელისუფლებამ არ უნდა დაუშვას. სრულიად დარწმუნებული ვარ, შეწყალების სკანდალი უკავშირდება მომავალ საპარლამენტო არჩევნებს, თუმცა ძნელია გარკვევა, ვინ შეიძლება იდგეს ამ ყველაფრის უკან. ამბობენ, რომ ელისაშვილს ისევ სახელისუფლებო ჯგუფის ერთი ნაწილი უმაგრებს, თუმცა არ გამოვრიცხავ, ელისაშვილის უკან რომელიმე ახალგამოჩენილი პოლიტიკური ძალაც იყოს, რომელიც საკუთარი შესაძლებლობების მოსინჯვას ამგვარად ცდილობდეს", - აცხადებს ექსპერტი.
მისი თქმით, ერთი რამ ცხადია, რომ ამ სკანდალიდან „სუფთა ხელებით ვერავინ გამოვა".
„ყოველთვის მომწონდა ალეკო ელისაშვილი, ვგულშემატკივრობდი კიდეც, მაგრამ მე მის ადგილზე, როგორც კი დავინახავდი ამგვარ ზეწოლას, მაშინვე ავყვირდებოდი და დავტოვებდი თანამდებობას", - განაცხადა თვალჭრელიძემ.
წყარო: კვირის პალიტრა
(მოამზადა ალა გრიგალაშვილმა)
