იუსტიციის უმაღლესმა საბჭომ 10 ხმით ერთის წინააღმდეგ მოსამართლე ახალი ვადით დანიშნა. უვადოდ დანიშვნამდე 3 წლიდან გამოსაცდელ პერიოდს ლევან მურუსიძე სააპელაციო სასამართლოს ადმინისტრაციულ პალატაში გაატარებს. გადაწყვეტილება საბჭომ ფარული კენჭისყრით მიიღო. თემასთან დაკავშირებით „რეპორტიორს" ესაუბრა სანდრო გირგვლიანის მამა გურამ გირგვლიანი. მისი თქმით, ამ გადაწყვეტილების შემდეგ დარწმუნდა, რომ უსამართლობას ვერ შეცვლის და ბრძოლას არანაირი აზრი არ ჰქონია, რადგან ასეთ ქვეყანაში ვცხოვრობთ.
„ადრეც მითქვამს, რომ თუ მსგავსი რამ მოხდება იქნება დიდი უღირსობა. გამოდის ბრძოლას არანაირი აზრი ქონდა. ამ გადაწყვეტილების შემდეგ დავრწმუნდი, რომ უსამართლობას ვერ შევცვლი. რას ვიზამ, ასეთ ქვეყანაში ვცხოვრობთ. როგორც ადრე აღვნიშნე და ვთქვი მართლაც მოხდა ამ პიროვნების არჩევა იუსტიციის უმაღლესი საბჭოს მიერ და ჩემი ეჭვიც, სამწუხაროდ, გამართლდა" - ამბობს გურამ გირგვლიანი „რეპორტიორთან" საუბრისას.
