საქართველოს ექს-პრემიერი ბიძინა ივანიშვილი ირაკლი ღარიბაშვილის პრემიერობიდან გადადგომის მიზეზებს განმარტავს და აცხადებს, რომ ღარიბაშვილმა მისი გზა გააგრძელა, რაც მისასალმებელია. ამის შესახებ ივანიშვილმა „20/30"-ის ეთერში ისაუბრა და აქვე განმარტა, რომ ირაკლი ღარიბაშვილის გადაწყვეტილებით „პოლიტიკურად დაკარგული 25 წელი დავიბრუნეთ".

„ღარიბაშვილის ნათესავებთან დაკავშირებით იყო კითხვები. მეც გავაკეთე ამაზე რეაქცია და ირაკლიმ ღირსეულად გაართვა თავი ამ პრობლემასაც, რომელიც ძალიან უმნიშვნელო თემებზე იყო წამოჭრილი. ოპოზიცია ცდილობდა ამის გაზვიადებას, მაგრამ იქ არაფერი ყოფილა და რაც მთავარია ირაკლი ამასაც ღირსეულად გაართვა თავი. კიდევ ერთხელ შევახსენებ ყველას, რომ პირადად მე დღესაც განვიცდი პრობლემებს ნათესავებთან დაკავშირებით. ეს არ არის იოლი საქმე.

არც მომავალი საპარლამენტო არჩევნები ყოფილა ძირითადი მიზეზი. ძირითადი მიზეზი გახლდათ ის, რაც მან თავის გამოსვლაში აღნიშნა. თუმცა, ოპონენტებმა და მედიის დიდმა ნაწილმა უყურადღებოდ დატოვა. მაგრამ, მთავარი აზრი იყო წასვლა წასვლისათვის. სწორედ რომ წარმატებული პრემიერი წავიდა. ეს იყო გაგრძელება ჩემი კურსის. ირაკლის გადაწყვეტილებით ჩვენ ის 25 წელიწადი დავიბრუნეთ, რომელიც დავკარგეთ პირწმინდად და არავითარი განვითარება არ ეტყობოდა პოლიტიკურად ჩვენს საზოგადოებას. სწორედ ირაკლის ნაბიჯით და თავში ჩემი ნაბიჯით და შემდგომ მთელი გუნდის ნაბიჯით, ის 25 წელი ჩვენ დავიბრუნეთ", - განაცხადა ივანიშვილმა.