საქართველოს ექს-პრემიერი ბიძინა ივანიშვილი საპარლამენტო გუნდის გადახალისების საჭიროებას ხედავს. როგორც ივანიშვილმა „20/30"-ში საუბრისას განმარტა,  „პარლამენტი კანონწარმოებაზე ორიენტირებული ხალხით უნდა გადახალისდეს".

„უკვე მქონდა რამდეიმე შეხვედრა და ვაგრძელებ ამ პროცესს, რომ გუნდი გადახალისდეს ახალი კადრებით. კიდევ ერთხელ ვახსენებ ყველას, რომ არავითარ კანონს არ ვარღვევ. მე მაქვს უფლება, რომ ჩემი გემოვნების ხარჯზე და ჩემი შესაძლებლობების ფონზე საკუთარ გუნდს მივცე რეკომენდაციები და არა თავს მოვახვიო. მე ამას გავაგრძელებ და გავაკეთებ.

მინდა გავიხსენო ჩვენი ძველი გუნდი, რომლის თითოეულ წევრსაც ძალიან დიდ პატივს ვცემ. ის არჩევნები რაც ჩვენ ჩავატარეთ 2012-ში იყო ომი და ჩვენ ეს ომი ღირსეულად მოვიგეთ, სუფთა ხელებით. ომი მოვიგეთ ღირსეულად, ისე, რომ ჩვენი მოწინააღმდეგე არ დავაზიანეთ ფიზიკურად. მაგრამ მაქსიმალურად ვაჩვენეთ მათი სახე. თითოეული ჩემი ყოფილი თანაგუნდელი ჩემთვის ძალიან ძვირფასია და მათ ძალიან დიდი ძალისხმევა ჩადეს იმ გამარჯვებაში, რომელიც ჩვენ მოვიპოვეთ. მაგრამ, ყველამ დავინახეთ, რომ ძალიან ბევრისთვის პარლამენტი არ არის ის ორგანო, სადაც შეუძლია მაქსიმალური რეალიზება გაუკეთონ საკუთარ შესაძლებლობებს. გუნდმა უნდა მოახერხოს გადახალისება, მაგრამ არა იმის საფასურად, რომ ახლანდელი კადრები დარჩნენ გუნდს მიღმა. გუნდის ყველა წევრმა უნდა ნახოს თავისი ადგილი გუნდში. გუნდის მხედველობაში არ მაქვს მხოლოდ პარლამენტი. პარლამენტი უნდა გადახალისდეს და ამის საჭიროება ჩვენს პარლამენტს ემჩნევა. უნდა გადახალისდეს კანონწარმოებაზე ორიენტირებული ხალხით", - განაცხადა ივანიშვილმა.