„ჩვენ თავად უნდა შევუქმნათ ზეიმი საკუთარ ქვეყანას", - ამბობს პარლამენტარი დიმიტრი ხუნდაძე, რომელიც ახალი 2016 წლისგან უკეთესს ცვლილებებს ელის.

„ვიდრე პოლიტიკურ ცხოვრებას დავიწყებდი, ახალ წელს განსხვავებულად ვხვდებოდი. ოჯახში შვილებთან და შვილიშვილებთან ერთად ვდგამდი ნაძვის ხეს, საღამოს ჩემი მშობლები სტუმრობდნენ ჩემს ოჯახს, რძალი, შვილიშვილები და ერთად ვატარებდით დროს დილამდე. ჩემი ცხოვრების წესი შეიცვალა და ამას ახლა ვეღარ ვახერხებ...

2013 წელს შევხვდი სოციალურად დაუცველთა ოჯახებში. შეძლებისდაგვარად, ჩემი სახელფასო დანაზოგიდან მათთვის ტკბილეული მიმქონდა და სახლში ძალიან გვიან ვბრუნდებოდი. 2014 წელს მცხეთაში ჩემს მოქალაქეებთან ერთად გავატარე ახალი წელი, მაშინაც გვიან მივედი სახლში... პოლიტიკურ საქმიანობას თავისი წესი აქვს, თავისი მოთხოვნები. წლევანდელი ახალი წელი არ დამიგეგმავს, მაგრამ ვეცდები, უფრო საინტერესოდ გავატარო, ვიდრე აქამდე.

ჩემს მოქალაქეებს ვუსურვებ ბედნიერ ახალ წელს. იმედი მაქვს, ჩვენ შევძლებთ იმ პრობლემების გადაჭრას, რაც დგას ქვეყნის და საზოგადოების წინაშე. ვფიქრობ, ყველა უნდა ვეცადოთ, რომ შემდგომი წელი წინასთან შედარებით უკეთესი იყოს. თუ ყველა ერთად მოვინდომებთ, ზეიმს საკუთარ ქვეყანას ჩვენ თავად შევუქმნით", - განაცხადა ხუნდაძემ „რეპორტიორთან".