„მწვანეთა პარტიის" ლიდერი ახალ წელს შვილიშვილების გარემოცვაში ატარებს. საახალწლო სამზადისში პირადად არის ჩართული და ნაძვის ხესაც თავად რთავს.

„მყავს 5 შვილიშვილი, ვცდილობ, ყველა ერთად შევიკრიბოთ, თუ ჩემი სიძეები და შვილები არ მიდიან სხვაგან. მაგრამ იციან, რომ მიყვარს მათთან ერთად ყოფნა ამ დროს და ცდილობენ, ერთად შევხვდეთ ახალ წელს.

როგორც ოჯახის უფროსი, საახალწლო სამზადისს მე ვხელმძღვანელობ. ნაძვის ხესაც მე ვრთავ, ჩემს შვილიშვილებთან ერთად. ეს ნაძვის ხე პლასტმასისაა და თითქმის 10 წელია რაც მაქვს, სათამაშოებიც ძველი მაქვს, მამაჩემის ნაყიდი. დღეს რომ არის უხარისხო, ისეთი კი არა, ნამდვილი და მაღალი ხარისხის. ასე რომ, ვრთავთ ნაძვის ხეს ერთად და განვაგრძობთ ქეიფს.

2015 წელი ჯანმრთელობასთან დაკავშირებით ცოტა რთული წელი იყო, რაც შეეხება პოლიტიკური თვალსაზრისით, ვფიქრობ, საკმაოდ იაქტიურა „მწვანეთა პარტიამ" პარლამენტში", - განაცხადა გაჩეჩილაძემ „რეპორტიორთან" საუბრისას.