„ოჯახში წინასაახალწლო სამზადისში მონაწილეობას ვერ ვიღებ. არც საჭმელების კეთება ვიცი, შესაბამისად, ვერ ვეხმარები დიასახლისებს ამ საქმეში",- ამბობს საქართველოს პარლამენტის წევრი ზაქარია ქუცნაშვილი. დეპუტატი ახალ წელს ტრადიციისამებრ, ყოველთვის ოჯახში ხვდება. მეორე ტრადიცია, რომელიც მას აქვს, ეს შობის დღესასწაულს უკავშირდება.
„ბოლო წლებია მე მყავს ჩემი ამომრჩეველი, რომელიც წარმოადგენს ჩემი დიდი ოჯახის ნაწილს. ვცდილობ, შობას თიანეთში, მათთან ერთად შევხვდე რომელიმე ეკლესიაში. ესენი ის ტრადიციებია, რასაც ახალ წელს და შობას ვიცავ", - განაცხადა ქუცნაშვილმა.
როგორც დეპუტატი ამბობს, 2015 წელი მისთვის, როგორც დეპუტატისთვის, ძალზედ ნაყოფიერი იყო.
„2015 წელი ჩემთვის, როგორც პარლამენტარისთვის, იყო ძალიან ნაყოფიერი წელი, ჩემი მოკრძალებული მონაწილეობით და ჩემი მეგობრების მხარდაჭერით მივიღეთ „მაღალმთიანი რეგიონების შესახებ" კანონი, რასაც საქართველოს 1300-ზე მეტი დაბა და სოფელი წლებია ელოდა. კანონი ამოქმედდება 1 იანვრიდან მთელი თავისი საგადასახადო შეღავათებით", - განაცხადა დეპუტატმა „რეპორტიორთან" საუბრისას.
