საქართველოსთვის ირანიდან ბუნებრივი აირის მიწოდების თაობაზე ენერგეტიკის სამინისტრო განცხადებას ავრცელებს:

„საინფორმაციო საშუალებებში დღეს გავრცელდა ინფორმაცია, რომ ირანი იწყებს საქართველოსთვის ბუნებრივი აირის მიწოდებას სომხეთის გავლით ელექტროენერგიის წარმოების მიზნით დღიურად 8-15 მილიონი კუბური მეტრის ოდენობით.

ამასთან დაკავშირებით უნდა აღინიშნოს, რომ ირანულ მხარესთან ამ ეტაპზე კონკრეტული შეთანხმება არ არსებობს და შესაბამისად ბუნებრივი აირის მოწოდების დაწყების საკითხიც არ არის გადაწყვეტილი.

აქვე უნდა აღვნიშნოთ, რომ ირანი ერთ-ერთი მსხვილი გაზის მწარმოებელი ქვეყანაა მსოფლიოში და ბუნებრივია გაგრძელდება მოლაპარაკებები ყველა პოტენციურ მომწოდებელთან  რეგიონში გრძელვადიან პერსპექტივაში საქართველოს სტაბილური და უწყვეტი გაზმომარაგების უზრუნველყოფის მიზნით", - ნათქვამია სამინისტროს განცხადებაში.

ირანული კომპანია NIGEC-ის აღმასრულებელმა დირექტორმა ალი რეზა კამელიმ განაცხადა, რომ ირანი საქართველოსთვის გაზის მიწოდებას აპირებს და ამ საკითხზე საქართველოს ხელისუფლებასთან მოლაპარაკებებს აწარმოებს.

მისი ინფორმაციით, ირანული გაზი საქართველოს სომხეთის გავლით მიეწოდება.

„საქართველოსთან გამართული მოლაპარაკებების თანახმად, გაზი სომხეთის საზღვრამდე უნდა მივაწოდოთ,  საქართველო მას სომხეთის საზღვარზე მიიღებს.

ამასთანავე, გარიგების ხელმოსაწერად, გაზის ექსპორტის გეგმა საქართველოსთვის ეკონომიურად სახარბიელო უნდა იყოს", - განაცხადა ალი რეზა კამელიმ.

გეგმის თანახმად, საქართველოს დღეში 300-500 მილიონი კუბური ფუტი ირანული გაზი მიეწოდება, რაც საქართველოს ელექტროენერგიის წარმოებას მოხმარდება.

კამილის განცხადებით, საქართველოსთვის განკუთვნილი ირანული გაზი შიდა მოხმარებისთვისაა განკუთვნილი და ევროპაში ექსპორტზე მისი გატანა არ იგეგმება.