საქართველოს ვიცე პრემიერმა, ეკონომიკისა და მდგრადი განვითარების მინისტრმა, დიმიტრი ქუმსიშვილმა საგანგებო ბრიფინგზე დიდთოვლობის გამო რეგიონებში შექმნილი მდგომარეობა შეაჯამა. ქუმსიშვილის განცხადებით, ინტენსიური მუსაობის შედეგად დაზიანებული გზები ძირითადად გაწმენდილია და საგზაო მიმოსვლა აღდგა, თუმცა ამჟამად ქობულეთში მცხოვრები 400-მდე აბონენტი ელექტრომომარაგების გარეშეა დარჩენილი.

„დიდთოვლობით გამოწვეული შეფერხებების აღმოფხვრაზე შესაბამისი სამსახურები საგანგებო რეჟიმში მუშაობენ აჭარაში. თოვლისგან გაწმენდილია ბათუმის ყველა ცენტრალური ქუჩა.

 31 დეკემბრიდან, ქალაქის მასშტაბით გზებისა და ტროტუარების გასაწმენდად მობილიზებულია დასუფთავების 200 თანამშრომელი და 25 ერთეული მძიმე ტექნიკა.

 საგანგებო რეჟიმში მუშაობენ მერიის სტრუქტურული ერთეულები და დაქვემდებარებული ორგანიზაციები. მერიაში ამოქმედდა ცხელი ხაზი, რომელიც 24 საათის განმავლობაში მუშაობს.

 დიდთოვლობის გამო ელექტროენერგია არ მიეწოდებოდა ქობულეთის მუნიციპალიტეტის 4 000-მდე აბონენტს, რომელთაგან ამ დროისთვის ელექტრომომარაგების გარეშე დარჩენილია 400-მდე აბონენტი.

იწმინდება სასოფლო გზები ხუცუბნის, სოფელ ქობულეთის, აჭყვისთავის, ციხისძირის, დაბა ჩაქვის, მუხაესტატესა და დაბა ოჩხამურის ადმინისტრაციულ ერთეულებში."- განაცხადა მინისტრმა.