ირაკლი კირკიტაძის აღკვეთის ღონისძიებაზე საქალაქო სასამართლო დღეს იმსჯელებს. სხდომა სასამართლოში 18:30 საათზეა ჩანიშნული. ცნობილია, რომ ირაკლი კირკიტაძისთვის აღკვეთის ღონისძიებად პროკურატურა პატიმრობის შუამდგომლობით სასამართლოს მიმართავს.
საქართველოს შინაგან საქმეთა სამინისტრო, ქვემო ქართლის ყოფილი გუბერნატორის, დავით კირკიტაძის ძმის - ირაკლი კირკიტაძის დაკავებასთან დაკავშირებით ინფორმაციას ავრცელებს.
როგორც უწყების მიერ გავრცელებული ინფორმაციიდან ირკვევა, დაკავებულმა ირაკლი კირკიტაძემ თბილისში, დიღმის მასივის მე-5 კვარტალში, უხეშად დაარღვია საზოგადოებრივი წესრიგი, სიტყვიერი და ფიზიკური შეურაცხყოფა მიაყენა მოქალაქეს და თავის არეში ცეცხლსასროლი იარაღი ჩაარტყა, რითაც მიაყენა ჯანმრთელობის დაზიანება.
"შსს-მ იარაღის გამოყენებით ჩადენილი ხულიგნობის ბრალდებით ერთი პირი დააკავა თბილისის პოლიციის დეპარტამენტის დიდუბე-ჩუღურეთის სამმართველოს 1-ლი განყოფილების თანამშრომლებმა, ოპერატიულ-საგამოძიებო ღონისძიებების შედეგად, 1979 წელს დაბადებული ირაკლი კ. ხულიგნობის ბრალდებით დააკავეს. გამოძიებამ დაადგინა, რომ დაკავებულმა თბილისში, დიღმის მასივის მე-5 კვარტალში, უხეშად დაარღვია საზოგადოებრივი წესრიგი, სიტყვიერი და ფიზიკური შეურაცხყოფა მიაყენა მოქალაქეს და თავის არეში ცეცხლსასროლი იარაღი ჩაარტყა, რითაც მიაყენა ჯანმრთელობის დაზიანება. გამოძიება ცეცხლსასროლი იარაღის გამოყენებით ჩადენილი ხულიგნობის (საქართველოს სსკ-ის 239-ე მუხლის მე-3 ნაწილი) ფაქტზე მიმდინარეობს", - აღნიშნულია შს სამინისტროს მიერ გავრცელებულ განცხადებაში.
