პარლამენტის საფინანსო-საბიუჯეტო კომიტეტის თავმჯდომარე თამაზ მეჭიაური ფიქრობს, რომ პარტია „ქართული ოცნების" თავმჯდომარე ყოფილი პრემიერ-მინისტრი ბიძინა ივანიშვილი უნდა იყოს.

როგორც „ინფო 9"-ს მეჭიაურმა განუცხადა, ის პარტიულ მშენებლობაში ჩართული არ არის და პარტიაში მიმდინარე პროცესებზე ნაკლებ ინფორმაციას ფლობს, თუმცა, ვარაუდობს, რომ გადახალისება მოხდება.

მეჭიაური ვერ აკონკრეტებს, ყოფილი პრემიერი ირაკლი ღარიბაშვილი შეინარჩუნებს თუ არა პარტია „ქართული ოცნების" თავმჯდომარის პოსტს:

„ღარიბაშვილი გადადგა და ვერ გეტყვით, ის თავმჯდომარის პოსტიდან წავა თუ არა, მაგრამ მისი გადასაწყვეტია, ამ გუნდში რა ფორმით დარჩება. ის თავს ამ გუნდის წევრად თვლის და ამას მივესალმები. ვინაიდან, ითქვა, რომ პოსტიდან უნდა გადადგეს, ალბათ, ის თავმჯდომარის თანამდებობას აღარც შეინარჩუნებს.

ვფიქრობ, რომ ყველაზე სწორი იქნებოდა, თავმჯდომარის პოსტზე ივანიშვილი ყოფილიყო, მაგრამ მის სიტყვას გადამწყვეტი მნიშვნელობა ექნება. გუნდის უმრავლესობა ამ პოსტზე ივანიშვილს მოიაზრებს, მაგრამ ვისაც რეკომენდაციას გაუწევს, დიდი ალბათობით, თავმჯდომარე ის იქნება. არ არის გამორიცხული, თავად პრემიერ-მინისტრი გიორგი კვირიკაშვილი იყოს", - დასძინა მეჭიაურმა.

ირაკლი ღარიბაშვილმა პრემიერ-მინისტრის პოსტი დეკემბრის ბოლოს დატოვა, მაგრამ ამ დრომდე, არ კონკრეტდება, ტოვებს თუ არა ის „ქართული ოცნების" თავმჯდომარის თანამდებობას.

წყარო: ინფო 9