საქართველოს პარლამენტის უმრავლესობის წევრმა თამაზ მეჭიაურმა დღეს გამართულ პრესკონფერენციაზე განაცხადა, რომ სპორტსმენებმა და მსახიობებმა, რომლებიც დღეს პარლამენტში არიან, ძალიან დიდი როლი შეასრულეს ხელისუფლების ცვლილებაში.
„რაც შეეხება სპორტსმენებს და მსახიობებს. მათ ძალიან დიდი როლი შეასრულეს ხელისუფლების ცვლილებაში. მაშინ როდესაც ძალიან მაღალი დონის პროფესიონალები საკმაოდ თბილად იჯდნენ სხვადასხვა სამსახურებში და ელოდებოდნენ რა შედეგი დადგებოდა 2012 წლის 1 ოქტომბერს, ამ ხალხმა გარისკა და დადგა იქ, სადაც წაგების შემთხვევაში მძიმე შედეგის წინაშე აღმოჩნდებოდნენ. აქედან გამომდინარე, იმათი მხრიდან, ვინც ამ პერიოდში ოქსფორდში ან კემბრიჯში სწავლობდა, სპორტსმენების და მსახიობების მიმართ ქედმაღლური ყურება არ მიმაჩნია სწორად.
სპორტსმენები და მსახიობები პარლამენტში არ არიან იმ დოზით, როგორც ზოგიერთს უნდა წარმოაჩინოს. პარლამენტში უნდა იყოს ისეთი თანაფარდობა, რომელიც ხელს შეუწყობს საკანონმდებლო საქმიანობას. რა თქმა უნდა, საჭიროებაა უფრო მეტად ეკონომისტების და იურისტების, მაგრამ წარმოდგენილი უნდა იყოს სპორტსმენიც, მსახიობიც და ა.შ. კახა კალაძე ყოფილი ფეხბურთელია, წარმატებული სპორტსმენია და არა მგონია ეს ხელს უშლიდეს ვინმეზე ნაკლები მინისტრი იყოს", - განაცხადა თამაზ მეჭიაურმა.
