ვან დეიკის ნახატთან დაკავშირებით, რამდენიმე საათიანი დაკითხვის შემდეგ ზაჰირ ჰუსეინოვმა ფინანსთა სამინისტროს საგამოძიებო სამსახური დატოვა. საგამოძიებო სამსახურში ამ დრომდე რჩება ზაჰირ ჰუსეინოვთან ერთად დაბარებული მალხაზ მახარაძე.

როგორც ჰუსეინოვმა აღნიშნა, შეკითხვები დაუსვეს, თუ როგორ შეიძინა ნახატი აბაშიძეების ოჯახისგან და როგორ გაიტანა საქართველოდან:

"მოვუყევი, როგორ გავიტანეთ ნახატი. იყო თუ არა ეს კონტრაბანდული გზით გატანა. საბუთები არის წესრიგში. საფუძველი არ არსებობს, რომ საქმე აღიძრას საქართველოში, რადგან ყველა დოკუმენტი წესრიგშია. გუშინ გაარკვიეს, რომ დოკუმენტები არის მოწესრიგებული და საგამოძიებო სამსახურში ეს დოკუმენტები წამოიღეს კულტურის სამინისტროდან. მკითხეს საიდან ვიცოდი სურათის შესახებ და როგორ გამოვიტანე. მე ვუთხარი, რომ არ ვიცოდი იმის შესახებ, თუ ეს სურათი იყო ძვირფასი. როგორც იყო, ზუსტად ისე მოვყევი", - აღნიშნა ჰუსეინოვმა.

შეგახსენებთ, ამ ორმა აბაშიძეების ოჯახიდან იყიდეს ნახატი და თურქეთში გადაიტანეს. მათი თქმით, ნახატი ეკა აბაშიძისგან 37 ათას დოლარად შეისყიდეს, თუმცა 7 ათასი გადაიხადეს, ვალად კი დარჩენილია 30 ათასი დოლარი.

თურქული მედიის ცნობით ნახატი ვან დეიკის ნამუშევარია და იგი 14 მილიონად არის შეფასებული.