ეკონომიკის საკითხებში ექსპერტის ლევან კალანდაძის განცხადებით, მოგვწონს თუ არ მოგვწონს, ამ ეტაპზე საქართველოში გაზის შემოტანა მხოლოდ ორი წყაროდან, აზერბაიჯანიდან „სოკარის" და რუსეთიდან „გაზპრომის" საშუალებითაა შესაძლებელი.
ექსპერტის განმარტებით, მნიშვნელოვანია, ორივე წყარო მაქსიმალურად ეფექტურად და ქვეყნის ინტერესების მაქსიმალური გათვალისწინებით იყოს გამოყენებული.
"ამ მხრივ, ძალიან კარგი და მისასალმებელია, თუ გაზის დეფიციტის დაბალანსებას ერთობლივად ორივე წყაროს, აზერბაიჯანული და რუსული წყაროებით განვახორციელებთ. შემდგომ წლებში გაზის დეფიციტის პრობლემის მოხსნის ერთ-ერთი ალტერნატიული გამოსავალის სახით დღეს უკვე განიხილება საქართველოში 200-250 მლნ. მ3 გაზსაცავის მშენებლობის აუცილებლობის საკითხი, რაც ნაწილობრივ მაინც მოხსნის ზამთრის ე.წ. პიკურ თვეებში გაზის დეფიციტთან დაკავშირებულ პრობლემას", - განაცხადა ექსპერტმა.
