საპარლამენტო უმრავლესობის ლიდერმა ზვიად კვაჭანტირაძემ სისტემურ დანაშაულებთან დაკავშირებულ საქმეებზე ინფორმაციის მიღების მიზნით პრეზიდენტის ადმინისტრაციის მხრიდან მთავარ პროკურატურაში წერილის გაგზავნის საკითხი შეაფასა. მისი თქმით, პრეზიდენტს აბსოლუტური უფლება აქვს მსგავსი ინფორმაცია მოიპოვოს.
„როდესაც პარლამენტში მთავარი პროკურორის პოსტზე ირაკლი შოთაძეს ვამტკიცებდით, მან წარმოადგინა პროგრამა, სადაც იგულიხმებოდა მუშაობის გაძლიერება ინსტიტუციონალური თვალსაზრისით, მათ შორის გახმაურებელი საქმეების, სამართლიანობის აღდგენის პროცესის ხელშესაწყობად. შექმნილია ახალი დეპარტამენტი და შოთაძის გადაწყვეტილებაა, რომ ეს დეპარტამენტი ხარისხობრივად და რიცხობრივად გაძლიერდეს. ამ ეტაპზე მე კითხვები არ მაქვს, მაგრამ დადგება დრო, როცა ჩვენც დავინტერესდებით, თუ რა პროგრესი გვაქვს ამ მიმართულებით. ამ პერიოდში ალბათ პრეზიდენტსაც უპასუხებენ და არც ჩვენთვის იქნება ინფორმაცია დამალული", - განაცხადა ზვიად კვაჭანტირაძემ.
პრეზიდენტის ადმინისტრაციამ ის წერილი გაასაჯაროვა, რომლითაც პრეზიდენტის მრჩევლმა კახა კოჟორიძემ საქართველოს პროკურატურას მიმართა.
წერილში კახა კოჟორიძის მხრიდან მთავარი პროკურორის სახელზე 6 კითხვაა დასმული, მათ შორის, წამებისა და არაადამიანური მოპყრობის მუხლებით რამდენი პირის მიმართ დადგა გამამტყუნებელი განაჩენი, აღნიშნული გამამტყუნებელი განაჩენებიდან რამდენ პირს გაუფორმდა საპროცესო შეთანხმება, თითოეულ შემთხვევაში რა სასჯელზე მოხდა შეთანხმება და რამდენი პირის მიმართ დადგა გამამტყუნებელი განაჩენი ათასობით აღმოჩენილ უკანონო, ფარულ ჩანაწერებთან დაკავშირებით.
