ეკონომიკის მინისტრი დიმიტრი ქუმსიშვილი აზერბაიჯანში არსებულ სავალუტო კრიზისს გამოეხმაურა. ვიცე-პრემიერმა ჟურნალისტებს განუცხადა, რომ ჩვენს ქვეყანას აქვს მცურავი გაცვლითი კურსი, რომელშიც შიდა და გარე შოკი უკვე დიდი ხანია ასახულია.

„ჩვენ ძალიან აქტიურად ვაკვირდებით იმ მოვლენებს, რომლებიც ახლა აზერბაიჯანში მიმდინარეობს. ჩვენ ქვეყანას აქვს მცურავი გაცვლითი კურსი, რომელშიც შიდა და გარე შოკი უკვე დიდი ხანია ასახულია", - განაცხადა ვიცე-პრემიერმა.

მისი თქმით, აზერბაიჯანში არსებული პროცესები საქართველოზე მინიმალურ გავლენას მოახდენს.

„რაც შეეხება აზერბაიჯანიდან სიტუაციის ჩვენს ქვეყანაზე გადმოცემას, სავარაუდოდ მოხდება, თუმცა დღეის მდგომარეობით, ეს გადმოცემა მინიმალური იქნება", - განაცხადა დიმიტრი ქუმსიშვილმა.