„ვერაფრითვეგუები იმას, სააკაშვილის მიერ დატოვებული ველოსიპედი ისევ თბილისის შუაგულშია წამოჭიმული. არაფერს ვამბობ იმ ორ მილზე, ავლაბრის აღმართზე ულამაზეს ხედს რომ ამახინჯებს, მათი აღება შესაძლოა დიდ თანხებთან იყოს დაკავშირებული, მაგრამ ამ ველოსიპედის გატანა რაღა გახდა?!", - ამ განცხადებას მსახიობი ლალი ბადურაშვილი „ასავალ-დასავალთან" ინტერვიუში აკეთებს. გთავაზობთ ამონარიდს:
„ამ მთავრობამ სამ წელიწადში ბევრი რამ გააკეთა. გადაუდებელი ოპერაციები უფასოდ კეთდება, C ჰეპატიტის ელიმინაციის პროგრამა ამოქმედდა. დღეს ახალგაზრდებს ჯიბეში წამალს აღარ უდებენ, უდანაშაულო ადამიანებს არ იჭერენ და არ აუპატიურებენ! ამის არ დანახვა შეუძლებელია.
ცოტა ხანს კიდევ ვაცდი მთავრობას და თუ არ იმოქმედებენ ჩაფიქრებული მაქვს, სააკაშვილის საყვარელი ქანდაკება ჩაქუჩით დავჩეჩქვო, ამას აუცილებლად გავაკეთებთ მე, ქეთინო კიკნაძე, ნელი კობიაშვილი და ბევრი სხვა ჩვენი თანამოაზრე.
გეკითხებით, როდემდე უნდა ვუყუროთ მიშას ნახუშტურალს?! გადაიტანეთ ვაკის პარკში, ან ზოოპარკში, სადაც ბავშვები დადიან. იცოდეთ, ველოსიპედს რომ დავჩეჩქვავ, ჯარიმასაც არ გადავიხდი და ჩამსვან ციხეში, თუ არ შერცხვება ამ მთავრობას.
ან როდემდე გვაცქერინონ იმ კოშმარს, გმირთა მოედანზე რომ არის აღმართული?! არ რცხვენიათ?! ამ „ფალოსზე" ომში დაღუპული ბიჭების სახელები წერია, რაც მათდამი პატივისცემა კი არა, მასხრად აგდება და შეურაცხყოფაა. თანაც მიდით აბა გამადიდებელი შუშის გარეშე თუ წაკითხავთ იქ დაწერილ გვარებს. რა გახდა ბოლოს და ბოლოს, მოგვაცილეთ ეს სირცხვილისა და უგემოვნობის სიმბოლო!
ძალიან მწყდება გული, რომ სააკაშვილის რეჟიმის სადისტები დღემდე არ არიან გასამართლებულები. თუმცა ისიც მესმის, რომ მათივე მეთოდებით არ სჯიან. აბა ერთი ოჯახის გაუპატიურებით დაემუქრონ, თუ არ აღიარებენ ყველაფერს", - განაცხადა ლალი ბადურაშვილმა.
მოამზადა სოფო ხუგოიანმა
წყარო: ასავალ-დასავალი
