პარლამენტის წევრის ელდარ კურტანიძის განცხადებით აუცილებელია პარლამენტი აღმასრულებელი ხელისუფლების მიმართ კრიტიკული იყოს, რაც პარლამენტის მუშაობაში ყოველთვის ჩანდა.
„პარლამენტი აღმასრულებელი ხელისუფლების მიმართ კრიტიკული უნდა იყოს. ჩვენ ერთი გუნდი ვართ, მაგრამ აღმასრულებელი ხელისუფლების მიმართ არაკრიტიკულობას ვერავინ დაგვწამებს. ჩვენს მიერ მიღებული კანონების აღსრულებაზე პასუხს ყოველთვის ვითხოვთ. აღმასრულებელ ხელისუფლებაში ცვლილებები შემთხვევით არ მომხდარა. ეს საკანონმდებლო ორგანოს პრინციპულობის და მოთხოვნების შესაბამისი იყო". - განაცხადა კურტანიძემ „2030"-ში სტუმრობისას.
„პარლამენტში მოღვაწეობის კიდევ ერთი წელი გვაქვს. არ ვიცი ერთი წლის შემდეგ რა იქნება, მაგრამ ბრძოლის დროს თითოეული დღე გადამწყვეტია და ჩვენ, ყოველდღიურად, მაქსიმალურად პროდუქტიულები უნდა ვიყოთ. ჩემი თანაგუნდელები ძალიან ღირსეული ადამიანები არიან. მათ უდიდეს პატივს ვცემ. წინა ხელისუფლება ყველამ ერთად შევცვალეთ". - განაცხადა პარლამენტის წევრმა.
