საპარლამენტო უმრავლესობის წევრი ლევან ბერძენიშვილი ვარაუდობს, რომ საქართველოს მოქალაქეები ევროპაში უვიზოდ მიმოსვლას ზაფხულიდან შეძლებენ. ლევან ბერძენიშვილმა ვიზა-ლიბერალიზაციასთან დაკავშირებულ პროცედურებზე პარლამენტში სტაჟიორებთან შეხვედრაზე ისაუბრა:

„საქართველოს მოქალაქეები ევროპაში უვიზოდ ზაფხულიდან უნდა წავიდნენ. პირველ ხანებში, საზღვარზე, მკაცრი მოთხოვნა იქნება. რისი უფლებაც აქვთ, იკითხავენ. გვკითხავენ - გვაქვს თუ არა მოწვევა, ვინმე გვხვდება თუ არა, რამდენი ხნით მივდივართ, გვაქვს თუ არა წასვლა-წამოსვლის ბილეთი, სად ვაპირებთ იქ ცხოვრებას.

პასუხად - „იქ რამეს მოვახერხებ", - შეიძლება არ მოეწონოთ და გვკითხავენ, დღეში 50 ევრო გვაქვს თუ არა. შეგვიძლია ყოველ 180 დღეში ევროპაში 90 დღე დავყოთ. ისეთი მომენტი არ უნდა დადგეს, რომ რომელიმე რიცხვიდან 180-90 დღე გავიდეს და შესაბამისი სანქციები ამოქმედდეს. შემდეგ მიგვეჩვევიან და ამ კითხვებს აღარ დაგვისვამენ.

უნიათო მთავრობას გვიწოდებენ, მაგრამ ფიცი მწამს და ბოლო მაკვირვებს, რადგან უნაითო მთავრობა 400 რეგულაციის დაწესებას ვერ შეძლებდა, რომელიც ვიზა-ლიბერალიზაციას სჭირდებოდა. საქართველომ ისეთი ურთულესი კანონების მიღება შეძლო, რაც საზოგადოებაში მოწონებული არ იყო. მმართველმა პარტიამ ისეთი კანონებიც მიიღო, რის გამოც ხმები დაკარგა", - განაცხადა ბერძენიშვილმა.