პარლამენტი ავტომობილებთან და საგზაო მოძრაობასთან დაკავშირებული საკანონმდებლო პაკეტის განხილვას იწყებს.
დღეს პარლამენტში პირველი საკომიტეტო სხდომა დარგობრივი ეკონომიკისა და ეკონომიკური პოლიტიკის კომიტეტმა დანიშნა, სადაც საგზაო მოძრაობასთან დაკავშირებული საკანონმდებლო პაკეტის განხილვა დაიწყება.
საკანონმდებლო ინიციატივას კომიტეტის წევრებს შს მინისტრის მოადგილე შალვა ხუციშვილი წარუდგენს.
მთავრობის მიერ შემუშავებულ საკანონმდებლო ინიციატივასთან დაკავშირებით რამდენიმე დღის წინ დეპუტატებმა შსს-ს წარმომადგენლებთან ე.წ. სამუშაო შეხვედრა გამართეს.
პარლამენტის წევრებს აქვთ შენიშვნები და განსხვავებული მოსაზრებები.
დარგობრივი ეკონომიკისა და ეკონომიკური პოლიტიკის კომიტეტის გარდა, აღნიშნული ინიციატივის განხილვის და დასკვნის მომზადების ვალდებულება აქვს ადამიანის უფლებათა დაცვისა და საფინანსო-საბიუჯეტო კომიტეტებს. წამყვანი კომიტეტი კი, იურიდიულ საკითხთა კომიტეტია. სწორედ საკომიტეტო განხილვების დასრულების შემდეგ გავა საკითხი პარლამენტის პლენარულ სხდომაზე.
