პროკურატურაში გამართული ბრიფინგის შემდეგ, მოკლული ბიზნესმენის - ბესიკ ხარძიანის ოჯახის ადვოკატმა მალხაზ სალაყაიამ ჟურნალისტებთან კომენტარი გააკეთა. როგორც ადვოკატი ამბობს, პროკურატურა ხარძიანის მკვლელობის საქმეზე უნაკლოდ მუშაობს:

„ვინ არის მკვლელობის დამკვეთი და ვინ იყო ბესიკ ხარძიანის სიკვდილით დაინტერესებული, ამას გამოძიება დამატებით გასცემს პასუხს ისევე, როგორც წარმატებით გააკეთა დღეს ეს", - განაცხადა ადვოკატმა.

რაც შეეხება მკვლელობის მოტივს, ადვოკატი აცხადებს, რომ ამასთან დაკავშირებით ვერაფერს იტყვის და ამაზე ისაუბრებენ ის პირები, რომელთაც ბრალი წარედგინა და რომლებიც წარსდგებიან სასამართლოს წინაშე.

„ამის შეფასება მოხდება სასამართლოში, თუმცა ოჯახი იმავე პოზიციაზეა", - განაცხადა მალხაზ სალაყაიამ.