ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა დავით ბაქრაძემ ევროპასთან ინტეგრაციის კომიტეტის სხდომაზე, სადაც დეპუტატებს ასოცირების დღის წესრიგის 2016 წლის სამოქმედო გეგმას აცნობს, განაცხადა, რომ არასრულწლოვანთა და ბავშვთა უფლებები 2016 წელს ერთ-ერთი პრიორიტეტული მიმართულება იქნება.

„2016 წლის გეგმის პრიორიტეტულ მიმართულებებთან დაკავშირებით მთავრობას აქვს ხედვა. ამ ხედვის ფარგლებში მნიშვნელოვან მიმართულებად მართლმსაჯულების რეფორმის მესამე ტალღა მოიაზრება. ასევე „სისხლის სამართლის კოდექსის" ლიბერალიზაციის, მოსამართლის დისკრეციის გაზრდის, ნათელი და განჭვრეტადი სისხლის სამართლის ნორმების ფორმირების მიზნით ცვლილებების პროექტის მომზადება. ასევე არასრულწლოვანთა დანაშაულის პრევენციის განახლებული სტრატეგიის და სამოქმედო გეგმის შემუშავება და განხორციელება. არასრულწლოვნები და ბავშვთა უფლებები ერთ-ერთი პრიორიტეტული მიმართულება იქნება 2016 წელს, გამომდინარე იქიდან, რომ ამ საკითხზე არაერთი ღია მსჯელობა გვქონდა, მათ შორის 2015 წლის შესრულების კონტექსტში სამოქალაქო სექტორთან. ეს სწორედ მათი ინიციატივით განისაზღვრა ერთ-ერთ პრიორიტეტად. მიუხედავად იმისა, რომ 2016 წლის სამოქმედო გეგმის დამტკიცება 27 იანვარს იგეგმება, ის უკვე ამოქმედებულია ბევრი მიმართულებით, მათ შორის ბავშვთა უფლებების კუთხით გასულ კვირას მთავრობას ჰქონდა შესაბამისი მნიშვნელოვანი ინიციატივები", - განაცხადა დავით ბაქრაძემ.