ენერგეტიკის მინისტრმა, ვიცე-პრემიერმა კახა კალაძემ ჟურნალისტების კითხვაზე - რაში აწყობს რუსეთს, ირანიდან მიაწოდოს ბუნებრივი აირი სომხეთს, მაშინ როდესაც ეს უფრო ძვირი დაუჯდება და შეიძლება თუ არა „ეს ჩვენს ჯინაზე გააკეთოს", განაცხადა, რომ ეს არ არის გამორიცხული.
„არ გამოვრიცხავ, რომ რუსეთს სომხეთისთვის ირანიდან გაზის მიწოდება უფრო მეტი დაუჯდეს, ვიდრე საქართველოს გავლით, თუმცა, მან მაინც პოლიტიკური გადაწყვეტილება მიიღოს.
რუსეთს რეალურად აქვს იმის შესაძლებლობა, სომხეთი ბუნებრივი აირით ირანიდან მოამარაგოს.
დღესაც აწვდის გაზს, თუმცა არა მთლიანი მოცულობით, რაც სომხეთს სჭირდება, თუმცა დამატებით ერთი მილიარდი შეუძლია მიაწოდოს სომხეთს ირან-სომხეთს შორის არსებული გაზსადენის მეშვეობით. გარკვეული ინვესტიციების განხორციელების შემდეგ კი, მათ აქვთ რეალური შესაძლებლობა, სრულად დააკმაყოფილონ სომხეთის ბაზარი ირანიდან მიწოდებული ბუნებრივი აირით. ეს, რა თქმა უნდა, ჩვენთვის ძალიან ცუდი იქნება. ასევე უნდა გავითვალისწინოთ ისიც, რომ ჩვენ ელექტროენერგიის თვალსაზრისით გარკვეულწილად დამოკიდებული ვართ რუსეთზე, შემოგვაქვს ელექტროენერგია, განსაკუთრებით, ზამთრის პერიოდში, როდესაც ყველაზე მაღალია მოხმარება და რეგიონში არსებულ ქვეყნებთან შედარებით ყველაზე საუკეთესო ფასია დადებული ელექტროენერგიაზე რუსეთის მხრიდან", - განაცხადა კახა კალაძემ.
