საპარლამენტო უმრავლესობის ლიდერი ზვიად კვაჭანტირაძე ევროპარლამენტის მიერ მიღებული რეზოლუციის იმ ნაწილს გამოეხმაურა, რომელიც მედიას ეხება. მისი თქმით, საქართველოს მთავრობა მზად არის, მწვანე შუქი აუნთოს ტელეკომპანია „რუსთავი 2"-თან დაკავშირებული პროცესის მონიტორინგს.
„თავიდანვე, როდესაც „რუსთავი 2"-ის ირგვლივ მოვლენები წამოიწია, ჩვენ ჩვენს ევროპელ პარტნიორებს და საერთაშორისო საზოგადოებას მივმართეთ, რათა სასამართლო პროცესები მაქსიმალურად გამჭვირვალე გაგვეხადა. ყველა კარი იყო ღია, რათა იმ პროცესებისთვის, რაც „რუსთავი 2"-ის ირგვლივ მიმდინარეობდა, საზოგადოებრივი მონიტორინგი გაეწიათ. ჩვენ ახლაც მზად ვართ, მწვანე შუქი ავუნთოთ ასეთ მონიტორინგს და რაც ამ საკითხთან დაკავშირებით მიმდინარეობს, აბსოლუტურად გამჭვირვალე იყოს", - განაცხადა ზვიად კვაჭანტირაძემ.
ევროპარლამენტმა საქართველოში კონკრეტულ საქმეებზე დაკვირვების მიზნით, შესაძლოა, ექსპერტთა მისია გამოგზავნოს.
„ევროპარლამენტი მხარს უჭერს საქართველოს მთავრობის იდეას ექსპერტთა მისიის გაგზავნის შესახებ, რომელიც მაღალი დონის მრჩევლებს, ევროპული სასამართლოს და ადამიანის უფლებათა ევროპული სასამართლოს ყოფილი მოსამართლეებისგან იქნება დაკომპლექტებული იმისთვის, რომ დააკვირდეს „რუსთავი 2"-თან დაკავშირებულ საქმეს", - აღნიშნულია დოკუმენტში.
