საპარლამენტო უმრავლესობის წევრი ლუკა კურტანიძე მიიჩნევს, რომ ლარის გაუფასურებაში თავისი როლი ეროვნულმა ბანკმაც ითამაშა, რომელსაც გიორგი ქადაგიძე ხელმძღვანელობდა.
კურტანიძე „კვირის ქრონიკასთან" აღნიშნავს, რომ ეროვნულ ბანკში მალე მოვა ისეთი ადამიანი, რომელიც ნებისმიერი პოლიტიკური ძალის გავლენისგან თავისუფალი იქნება.
„ეს პრობლემა მოსაგვარებელი და გადასაწყვეტია. ერთ თვეში ეს ამბავი გადაწყდება.
ეროვნულ ბანკში მოვა ის ადამიანი, რომელიც იქნება თავისუფალი ნებისმიერი პოლიტიკური ძალისგან. სამწუხაროდ, საქართველოში უმტკივნეულოდ არაფერი ხდება."- აღნიშნავს კურტანიძე.
„ლუკა, შენ თავიდან ისე დაიწყე, რომ მომეჩვენა, მე მგონი, პარლამენტში მშვიდობის მტრედის ფუნქცია დაგაკისრეს."- მიმართავს ჟურნალისტი კურტანიძეს, რაზეც უმრავლესობის წევრი პასუხობს, რომ ის და მისი თანამოაზრეები ქვეყნის კეთილდეღობისთვის ერთად იბრძოლებენ.
„არა ვარ არა მშვიდობის მტრედი... უბრალოდ, არ მინდა, საზოგადოებამ დაინახოს, რომ ერთი გუნდის წარმომადგენლები იწყებენ ერთმანეთის წინააღმდეგ ბრძოლას და იმის მტკიცებას, ვინ ვისზე უკეთესია. თუ ჩვენ დავიწყებთ ერთმანეთის გინებას, ხალხი იტყვის, ესენი ერთმანეთს ვერ იტანენ და საქართველოს აიტანენო? ყველაფრის გამოტანა სააშკარაოზე არ შეიძლება.
ჩვენ გვჭირდება თვითკრიტიკა, თვითანალიზი და ამის შემდეგ საკუთარ თავს უნდა ვკითხოთ: ვარ კი მე მზად შემდეგი ბრძოლისთვის თუ არა? თუ ადამიანი მზად არ არის, მაშინ უკვე პრობლემაა."- აცხადებს ლუკა კურტანიძე.
