საქართველოს პრემიერ-მინისტრი გიორგი კვირიკაშვილი არასამთავრობო სექტორის წარმომადგენლებს ხვდება. შეხვედრა მთავრობის ადმინისტრაციაში მიმდინარეობს და მას 20-მდე არასამთავრობო ორგანიზაციის წარმომადგენელი ესწრება.
შეხვედრის დაწყებამდე კომენტარი ჟურნალისტებთან ახალგაზრდა იურისტთა ასოციაციის თავმჯდომარე ანა ნაცვლიშვილმა გააკეთა. მისი განმარტებით, შეხვედრის ინიციატივა პრემიერს ეკუთვნის და დასაფასებელია, რომ მთავრობის მეთაურს არასამთავრობო ორგანიზაციების წარმომადგენლებთან შეხვედრის ინტერესი აქვს:
„იმედი გვაქვს, რომ პირველი, ეს შეხვედრა იქნება კონკრეტულ საკითხებზე და კონკრეტული შედეგები ექნება პრემიერის წინაშე დასმულ საკითხებს. მეორე იმედი და შეთავაზება, რაც მექნება პრემიერთან, არის ის, რომ ამ ტიპის შეხვედრებმა მიიღოს გარკვეულწილად სისტემატური ხასიათი, რადგან ძალიან მნიშვნელოვანია, ქვეყნის უმაღლესი თანამდებობის პირებთან არასამთავრობო ორგანიზაციებს და სამოქალაქო საზოგადოებას ჰქონდეს პირდაპირი წვდომის შესაძლებლობა. რაც შეეხება კონკრეტულ საკითხებს, წარმოდგენილი ორგანიზაციები სხვადასხვა სფეროებს ფარავენ და ყველას ექნება შესაძლებლობა, რომ მათთვის განსაკუთრებით მნიშვნელოვან საკითხებზე ისაუბროს. მე ვისაუბრებ ინსტიტუციური რეფორმების გაგრძელების და გაღრმავების მნიშვნელობაზე, როგორიცაა სასამართლო, პროკურატურა, შსს. დაისმება ასევე სხვა მნიშვნელოვანი საკითხები კონკრეტული უფლებადარღვევის ფაქტებზე და ტენდენციებზე და იმაზე, რომ დაუსჯელობის შეგრძნება ქვეყანაში არ უნდა გაჩნდეს, ეს იქნება დამღუპველი როგორც ქვეყნისთვის, ისე თითოეული ადამიანისთვის", - განაცხადა ნაცვლიშვილმა.
