1925 26 იანვარს ქართველი მწერალი, ისტორიკოსი და პროფესორი ლევან სანიკიძე დაიბადა.

ლევან სანიკიძემ დაამთავრა წულუკიძის სახელობის ქუთაისის პედაგოგიური ინსტიტუტის ისტორიული ფაკულტეტი. იყო ს. ყაუხჩიშვილის ასპირანტი. მეორე მსოფლიო ომის პერიოდში სამი წელი იმსახურა ჯარში. 28 წლის ასაკში დაიცვა საკანდიდატო დისერტაცია. 1966 წელს დაიცვა სადოქტორო დისერტაცია და მიენიჭა პროფესორის წოდება.

1975 წელს მიიწვიეს თბილისის სახელმწიფო უნივერსიტეტის ძველი მსოფლიოს ისტორიის კათედრის გამგედ.

ლევან სანიკიძე წერდა პიესებს, წერილებს, ისტორიულ თხზულებებს. განსაკუთრებით ცნობილია ლევან სანიკიძის „უქარქაშო ხმლები" - მხატვრულ-დოკუმენტური ნაწარმოები და „დედა ისტორია".

ლევან სანიკიძის თხზულებებში მომხიბლავად არის შერწყმული ისტორიული ფაქტები რომანის ელემენტებთან. იგი აცოცხლებს ისტორიულ პერსონაჟებს, გვიხატავს მათ ისეთი ფერებით, რომ მკითხველისთვის ემოციურად ახლობელს ხდის გმირებს და უკეთ გასაგებს იმ ეპოქას, რომელშიც ისინი ცხოვრობდნენ.

1956 წელს გამოქვეყნდა მისი პირველი პიესა „გაიუს გრაკხუსი", რომელიც 1957 წელს დაიდგა. ამას გარდა, მას ჰქონდა პიესები „მედეა", „სპარტაკი", „ქუთათურები", რომლებიც დიდი წარმატებით იდგმებოდა ქართული თეატრების სცენებზე.

1976-1981 წლებში გამოქვეყნდა ლევან სანიკიძის მხატვრულ-დოკუმნტური თხზულება „უქარქაშო ხმლები", რომელიც რამდენიმეჯერ გამოიცა. მასვე ეკუთვნის ასევე პოპულარული წიგნები: „ანტიკური ქვეყნების ისტორია", „ამბავი კოლხი ასულისა", „რომის იმპერია", „მარიუსი და სულა", „კვერთხი ეშმაკთა", „კეისარიადა", „სამას-სამასი", „ალექსანდრე მაკედონელი", „გიორგი სააკაძე", „დედა ისტორია", „დავით აღმაშენებელი", „თამარიანი", „სავედრებელი გიორგი ათონელისა", „მესამე დასის საქართველო", „წიგნი მოწამეთა", „პონტოელნი", „მკვლელობა ხობისწყლის პირას", „პუნიკური ომები".

ლევან სანიკიძე 2001წლის 29 იანვარს გარდაიცვალა.