„მივესალმები იმ პროცესს, რომელიც დაიწყო საქართველოს პრემიერ-მინისტრთან", - ამის შესახებ საქართველოს პრეზიდენტმა გიორგი მარგველაშვილმა საარჩევნო საკითხებზე მომუშავე, არასაპარლამენტო ოპოზიციის ინტერპარტიული ჯგუფის წევრებთან შეხვედრის დასრულების შემდეგ განაცხადა. როგორც მარგველაშვილმა განმარტა, მსგავსი დისკუსიები ქართულ პოლიტიკურ კულტურას უფრო მაღალ სტანდარტებზე აწევს.
„შარშან ჩვენ ძალიან აქტიურად ჩავერთეთ იმაში, რომ შეგვექმნა ფორუმი, რათა მომხდარიყო კონსენსუსი ყველა პოლიტიკურ ძალასთან ძირითადი თამაშის წესებთან დაკავშირებით. მივესალმები იმ პროცესს, რომელიც დაიწყო საქართველოს პრემიერ-მინისტრთან, რადგან მეტი გახსნილობა, როგორც პოლიტიკური ოპონენტების, ასევე სამოქალაქო სტრუქტურების ჩართვის თვალსაზრისით, არის წინაპირობა ევროპული პოლიტიკური კულტურის დაფუძნების საქართველოში. ასეთი დისკუსიები რა შედეგისკენაც არ უნდა იყოს ორიენტირებული, მიგვიყვანს მეტ თანხმობამდე, რაც ნიშნავს, ქართული პოლიტიკური კულტურის უფრო მაღალ ევროპულ სტანდარტებზე აწევას", - განაცხადა მარგველაშვილმა.
საქართველოს პრეზიდენტმა ავლაბრის რეზიდენციაში არასაპარლამენტო ოპოზიციის ინტერპარტიულ ჯგუფთან საარჩევნო საკითხზე შეხვედრა გამართა. გუშინ კი აღნიშნული ჯგუფის წევრები პრემიერ-მინისტრმა გიორგი კვირიკაშვილმა მიიღო. აუდიენციის ფარგლებში მხარეები საარჩევნო საკითხზე სამუშაო ჯგუფის შექმნაზე შეთანხმდნენ.
