ეკონომიკისა და მდგრადი განვითარების მინისტრმა, ვიცე-პრემიერმა დიმიტრი ქუმსიშვილმა გადაცემა „არჩევანში" საუბრისას განაცხადა, რომ ვალუტის კურსის ხელოვნურად შენარჩუნება ღია ეკონომიკის პირობებში პრაქტიკულად არის შეუძლებელი და შესაძლებელია მხოლოდ იმ შემთხვევაში, თუ არსებობს სწორი სავაჭრო ბალანსი.
„მოკლევადიან პერიოდში სახელმწიფოს შეუძლია პირველი ის, რომ გააკეთოს ინტერვენციები და მეორე, შეამციროს ფულის მასა. ინტერვენციების გაკეთება არავითარ შემთხვევაში არ შეიძლება, თუ ფუნდამენტი გვაჩვენებს, რომ ჩვენ კიდევ უფრო მეტად უნდა გავუფასურდეთ და მეორე, ფულის მასის შემცირების შემთხვევაში ეკონომიკა შემცირდება. პარასკევსაც და დღესაც ეროვნულმა ბანკმა გამოიტანა და გაყიდა 20-20 მილიონი დოლარი და ეს არის სწორედ ის პასუხი მოკლევადიან პერიოდში, რომელიც სახელმწიფოში ინსტრუმენტების სახით არსებობს. არ არსებობს სხვა ინსტრუმენტი. თუ ვინმე დამისახელებს სხვა ინსტრუმენტს, დიდი სიამოვნებით მოვუსმენ.
მაგალითად, აზერბაიჯანის ეკონომიკა, რომელიც არის რამდენიმეჯერ დიდი, 10 მილიარდი დოლარი დახარჯა, მაგრამ აქვს 105 %-იანი გაუფასურება. აქედან დასკვნებიც გამომდინარეობს, რომ ვალუტის კურსის ხელოვნურად შენარჩუნება ღია ეკონომიკის პირობებში პრაქტიკულად არის შეუძლებელი და შესაძლებელია მხოლოდ იმ შემთხვევაში, თუ არსებობს სწორი სავაჭრო ბალანსი", - განაცხადა დიმიტრი ქუმსიშვილმა.
