საქართველოში ამერიკის შეერთებული შტატების ელჩი იან კელი რუსეთის საგარეო საქმეთა მინისტრის სერგეი ლავროვის გუშინდელ განცხადებას გამოეხმაურა, სადაც ლავროვი აცხადებს, რომ „ისლამური სახელმწიფოს" მებრძოლები პანკისის „რთულად მისასვლელ ტერიტორიას საწვრთნელად, დასასვენებლად და მარაგების შესავსებად იყენებენ".
„საქართველო და აშშ ერთად უპირისპირდებიან ტერორიზმს. მოვისმინე მოსკოვში გაკეთებული განცხადებები დ გიორგი კვირიკაშვილის სიტყვებს მოვიშველიებ. მან თქვა, რომ სიტუაცია კონტროლის ქვეშ არის და ჩვენ ამ საკითხში სრულიად ვუჭერთ მხარს საქართველოს. რაც შეეხება რუსეთთან კონტაქტების აღდგენას, ეს თავად საქართველოს გადასაწყვეტია. ჩვენ პრაგმატული ურთიერთობების მომხრე ვართ და მხარს ვუჭერთ ჟენევისა და აბაშიძე-კარასინის მოლაპარაკებების ფორმატს", - განაცხადა იან კელიმ.
