„ქართული დასის" ლიდერი ჯონდი ბაღათურია 2016 წლის საპარლამენტო არჩევნებზე საუბრობს და აცხადებს, რომ აღნიშნული არჩევნები რუსეთთან ურთიერთობისა და სტრატეგიული თანამშრომლობის აღდგენის მომხრე პოლიტიკურ ძალებსა და პროდასავლურ ძალებს შორის ბრძოლად იქნება განხილული. როგორც ბაღათურიამ „რეპორტიორის" პრესკლუბში გამართულ ბრიფინგზე განაცხადა, საზოგადოების დაახლოებით 60 % დღეს რუსეთთან ურთიერთობისა და მოკავშირეობის აღდგენის მომხრეა.

„2016 წლის არჩევნები რუსეთთან ურთიერთობისა და სტრატეგიული თანამშრომლობის აღდგენის მომხრე პოლიტიკურ ძალებსა და პროდასავლურ ძალებს შორის ბრძოლად იქნება განხილული. აქ ძალიან დიდი მნიშვნელობა აქვს ელექტორატის განწყობას და იმ ელექტორატის რაოდენობა, რომელიც რუსეთთან ურთიერთობის და მოკავშირეობის აღდგენას ემხრობა, საკმაოდ დიდია და რაოდენობა კიდევ უფრო იზრდება. 30%, რომელიც NDI-იმ გამოაქვეყნა, არ არის სწორი მონაცემი, ეს გაცილებით უფრო მეტია. ჩემი განცდით, საზოგადოების დაახლოებით 60% მოითხოვს ურთიერთობის ნორმალიზებას რუსეთთან", - განაცხადა ჯონდი ბაღათურიამ.