2008 წლის აგვისტოს ომის მოვლენებს ჰააგის საერთაშორისო სასამართლო გამოიძიებს. როგორც პოლიტოლოგმა ვახტანგ მაისაიამ „რეპორტიორს" განუცხადა, ჰააგის სასამართლოს გამოძიების შედეგად დანაშაულის ნიშნები გამოიკვეთება იმ პოლიტიკოსების მიმართ, რომლებიც მაშინ იყვნენ წამყვან თანამდებობეზე როგორც საქართველოს, ასევე რუსეთის ხელისუფლებაში.

„გავეცანი ინფორმაციას ჰააგის ტრიბუნალის ვებგვერდზე, სადაც გამახვილებულია ყურადღება საქართველოში ჩადენილ დანაშაულებზე, კერძოდ, ეთნიკური ქართველების იძულებით გადაადგილებაზე, ეს დადებითი მომენტია. იქ არის ასევე საინტერესო ნიუანსები, რაც საქართველოს იმდროინდელი ხელისუფლების წარმომადგენლებისთვის არასასიამოვნო იქნება. საუბარია სამშვიდობოებზე თავდასხმის ფაქტთან დაკავშირებით. აღნიშნულია, რომ ცხინვალი და სამხრეთ ოსეთი არის საქართველოს ტერიტორია და მოხსენიებულია როგორც საქართველოს ერთიანი ტერიტორიის ნაწილი. ანუ საქართველოს ტერიტორიული მთლიანობა სრულად მხარდაჭერილია", - განაცხადა მაისაიამ.

მისი თქმით, განაჩენი შეეხება არა ქვეყნებს, არამედ კონკრეტულად პოლიტიკოსებს, რომლებიც წარმოადგენდნენ რუსეთის და საქართველოს ხელისუფლების იმდროინდელ ელიტას. „საქართველო და რუსეთი აგებენ პასუხს იმ პოლიტიკოსების სახით, რომლებმაც ჩაიდინეს დანაშაული. ჰააგის ტრიბუნალი სწორედ პოლიტიკოსებს გაასამართლებს", - განუცხადა „რეპორტიორს" მაისაიამ.