თავდაცვის მინისტრის თინა ხიდაშელის განცხადებით, რუსეთის საგარეო საქმეთა მინისტრის განცხადება იმის შესახებ, რომ რუსეთ-საქართველოს შორის დიპლომაიტიური ურთიერთობები უნდა დალაგდეს, მისასალმებელია, რადგან „ქვების სროლას" ყოველთვის მოლაპარაკებების გზით ურთიერთობა ჯობია.
როგორც გადაცემა „2030"-ში თავდაცვის მინისტრმა აღნიშნა, სანამ ოკუპირებულ აფხაზეთსა და ცხინვალის რეგიონში რუსეთის უკანონო საელჩოები არსებობს, რუსეთის მხრიდან, საქართველოს სუვერენულ სახელმწიფოსთან, რამე სახის დიპლომატიური ურთიერთობების აღდგენაზე საუბარი შეუძლებელია.
"დამოუკიდებელი სახელმწიფოს ტერიტორიაზე 3 საელჩო არ იხსნება. მანამ, სანამ აფხაზეთსა და სამაჩაბლოში რუსეთის უკანონო საელჩოები არსებობს, რუსეთის მხრიდან, საქართველოს სუვერენულ სახელმწიფოსთან, რამე სახის დიპლომატიური ურთიერთობების აღდგენაზე საუბარი შეუძლებელია. საქართველოს დღეს ჰყავს ხელისუფლება, რომელიც მშვიდობისთვის ყველაფერს აკეთებს. ყოველთვის სჯობს ილაპარაკო, ვიდრე ერთმანეთს ტყვია ესროლო. შეხვედრების პრობლემას ვერ ვხედავ. ორი ქვეყნის მთავარი დიპლომატების შეხვედრას წინ არაფერი უდგას, მაგრამ ბატონმა ლავროვმა უნდა განმარტოს, თუ რაზე უნდა ვისაუბროთ ამ შეხვედრაზე", - განაცხადა ხიდაშელმა.
შეგახსენებთ, რომ რუსეთის საგარეო საქმეთა მინისტრმა სერგეი ლავროვმა ქართველ კოლეგასთან შეხვედრაზე მზადყოფნა გამოთქვა.
