პრემიერ-მინისტრი გიორგი კვირიკაშვილი, სავარაუდოდ, კოალიცია „ქართული ოცნების" საარჩევნო სიის პირველი ნომერი იქნება. ამის შესახებ დღეს პოლიტსაბჭოს სხდომის შემდეგ საპარლამენტო უმრავლესობის წევრმა ირაკლი სესიაშვილმა განაცხადა.

სესიაშვილის თქმით, კვირიკაშვილი „ქართული ოცნების" ლიდერია და შესაბამისად, სიის პირველ ნომრადაც ის მოიაზრება.

„გიორგი კვირიკაშვილი არის პრემიერ-მინისტრი, ჩვენი პარტიის ლიდერი და ვფიქრობ, რომ ის უნდა იყოს კოალიციის საარჩევნო სიის პირველი ნომერიც. ეს ჯერ გადაწყვეტილი არ არის. თუმცა, მე ვისურვებდი, რომ ის იყოს პირველი ნომერი", - განაცხადა სესიაშვილმა.

„ქართული ოცნების" პოლიტსაბჭოს სხდომაზე ასევე გადაწყდა, რომ დღეიდან პოლიტსაბჭოს პრემიერ-მინისტრი გიორგი კვირიკაშვილი უხელმძღვანელებს.